Fréttatilkynning Í.K.

Details: Created: Wednesday, 10 August 2016 20:21

Stjórn Íbúasamtaka Kjalarness hafa sent frá sér fréttatilkynningu vegna fyrirhugaðrar svifbrautar (kláfs) á Esju í mógilsá. En þar segir:

Íbúasamtök Kjalarness leggjast alfarið gegn því að Reykjavíkurborg undirriti samning um leigu á lóðum í hlíðum Esju í tengslum við áætlanir fyrirtækisins Esjuferju ehf. um svifbraut á Esju. Svifbrautin er ekki í samræmi við gildandi skipulag og umsagnaraðilar hjá ríkinu og Reykjavíkurborg vara við framkvæmdunum. Íbúasamtökin gera einnig alvarlegar athugasemdir við stjórnsýslu í tengslum við verkefnið. Svifbrautinni er ætlað að ferja um 150.000 ferðamenn á ári upp á topp Esju, sem í skipulagi hefur verið skilgreindur með lítið útivistarþol. Um er að ræða:

þrjú 37 – 45 m há möstur sem munu sjást í 10 – 12 km fjarlægð og nokkur minni þar á milli,
1.000 – 1.500 fm byggingu á upphafsstöð við Esjurætur,
800 – 1.000 fm byggingu við Rauðhól í miðri Esju í 467 m hæð yfir sjávarmáli,
veg þangað sem einnig mun sjást í 12 km fjarlægð,
300 – 500 fm byggingu uppi á toppi Esju í 900 m hæð,
farþegakláf sem tekur allt að 80 farþega,
efnisþörf framkvæmda á bilinu 10.000 – 17.000 rúmmetrar,
beina röskun á trjágróðri sem fjarlægja þarf á lóðunum, en kláfurinn mun liggja við og yfir svæði þar sem nú þegar eru fjölfarnir göngustígar og skógurinn er hvað þéttastur.

Reykjavíkurborg hefur að ósk einkafyrirtrækis staðið í viðræðum við Fjármálaráðuneytið um milligöngu um leigu á landi undir kláf og þjónustustöðvar í Esju, innan marka „Græna trefilsins“. Lóðaleigusamningur liggur nú fyrir og stendur undirritun af hálfu borgarráðs til á næstunni. Með samningnum er land tekið af Skógrækt ríkisins og leigt til Reykjavíkurborgar.

Fréttatilkynninguna má lesa í heild sinni HÉR.

Frekari gögn um málið er að finna HÉR.

Áður hefur hverfisráð kjalarness fjallað um málið og á 144 fundi ráðsins var samþykkt bókun sem má lesa HÉR.